DIXEBRA EN CONCIERTU NA SALA TRIBECA LIVE UVIÉU

Con esta actuación la formación avilesina, una de les decanes del rock contemporáneu n'Asturies, acaba un añu nel que percorrieron bona parte de la xeografía de la comunidá, participando en festivales y eventos como la Nueche de San Xuan de Tresona (Corvera), Zarréu Fest (Degaña), Maízu Rock d'Intriago (Cangues d'Onís), Fiestes de La Llaguna de L'Entregu (San Martín del Rei Aurelio), Fiestes Populares de Ciares (Xixón), UniRock de Veiga (Navia), Nueche Celta de Soto (Ayer) o Fiestes de La Peruyal de Les Arriondes (Parres), amás de salíes al esterior como al Folkkomillas (Cantabria) o al Vendaval Fest de Ribadeo (Galicia). Un añu enllenu d'actividá, con una xira na que principalmente interpretaron temes recoyíos nel so últimu trabayu, un llibru-discu tituláu Ente la niebla, nel que faen un percorríu pela historia de les clases populares y trabayadores asturianes nel últimu sieglu, con composiciones dedicaes a sucesos que marcaron el so devenir, tratando cuestiones como la emigración económica, la Revolución de 1934, la guerra civil, l'exiliu, la represión, la recomposición del movimientu obreru, la Fuelgona de 1962, la solidaridá popular o los conflictos llaborales producíos pola reconversión industrial.

Pa esti conciertu'l repertoriu va incluyir bien d'estos cantares, pero tamién otros clásicos de la banda y dellos qu'hai cuantayá que nun interpreten en directo, faciendo un repasu de les sos más de tres décades de vida. Ye yá una tradición que Dixebra se realcuentre neses feches con munchos y munches siguidores espatriaos que vuelven a casa y recarguen piles cola potencia de la banda en vivo.